設小組助與中央溝通
俗語說，先撩者賤打死無怨，其實泛民同建制一直喺正副主席人選上有協議，究竟係邊個唔尊重傳統同協議，相信大家都心知肚明，所以建制就算搶走所有席位都無得好講。
另外，泛民議員亦都宣布成立民主派聯絡小組，希望同中央溝通表達一個正面態度。小組召集人郭榮鏗就希望泛民可以同中央有正常化、透明化及專業化嘅溝通，但小組只係知會角色，唔會就中央同個別黨派嘅溝通作出決定或表決，亦唔會綑綁立場。
政改方案已被泛民否決，之前唔肯溝通，依家見到民主黨同中央溝通，又唔抵得話要溝通，都唔知做緊乜，而新民主同盟范國威就拒絕參與呢個聯絡小組喇。