自由黨立法會議員張宇人早前玩嘢，突然提出想爭做內務委員會主席，加劇建制派內部撕裂，但佢同自由黨被其他建制派及西環嚇兩嚇之後，好快就宣布放棄，理由竟然係為免其他建制派難做，真係乜都畀佢講晒。
點知到尋日又到該黨榮譽主席田北俊（田少）講廢話，話以特首梁振英（CY）現時嘅表現，佢唔會支持對方連任喎。其實自由黨一向都屬於「唐營」，一二年特首選舉都冇支持CY，依家又點會有人期望佢哋會轉軚呢？
田北俊又話，明年立法會選舉唔會同建制派協調。查實無論係建制派定泛民主派，一般只會就單議席單票制嘅區議會選舉進行協調，實行比例代表制嘅立會選舉一向都冇協調可言，尤其係向來獨行獨斷嘅自由黨。呢番拒絕協調言論，同樣講咗等於冇講。
談及取消強積金對沖機制，來自工商界嘅田北俊炮轟政府亂向傳媒放風，無經勞顧會討論，做法不負責任。但張宇人提出角逐內委會主席，同樣未經建制派內部討論就先放風，呢筆數又點計先？