中環出更：名人補腦良方打牌睇小說
人口老化問題愈來愈嚴重，為加深市民對腦退化症的認識，由香港中文大學協助管理的賽馬會耆智園日前舉行十五周年慶典兼「腦動全城閉幕禮」。多年前證實患上腦退化症、有「光纖之父」之稱的諾貝爾得獎人高錕亦有出席，並全程拖實太太高黃美芸，馬會大董梁高美懿及中文大學副校長霍泰輝等則大談補腦大法。
霍泰輝：合桃補腦無乜根據
有份出席活動的立法會議員鄧家彪話，每晚臨瞓前都會遠離電子產品，以免影響睡眠質素，平時又好鍾意食蜜糖焗合桃，聽聞有助補腦喎。
咁究竟食合桃係咪真係可以補腦？本身係醫生嘅霍泰輝就坦言，合桃補腦無乜根據，有人認為食合桃同豬腦可以補腦，只係因為似腦，覺得可以以形補形，但人腦點都聰明過豬腦，食完豬腦咪蠢咗？所以佢話保持健康作息、營養均衡先係最實際，而佢亦不時睇小說，藉幻想小說描述的畫面鍛煉腦部。
安老事務委員會主席陳章明亦係愛閱讀之人，除咗鍾意睇科幻小說，亦酷愛科幻電影。至於佢平日就會同家人打麻將，因為經常見面無咁多偈傾，所以打吓麻雀就最啱喇。
至於梁高美懿就有另一護腦妙法，就係每晚好似溫書咁重溫一日發生嘅人和事，諗吓見過啲咩人，唔記得就即刻睇番，當運動個腦之餘又可以令翌日工作更有效率，一舉兩得。
卓妮