政府新聞處大執位！新聞處尋日出咗「黃榜」，其中律政司司長袁國強嘅新聞秘書庾志偉（Terence）將會升任助理處長，專責本地公共關係。Terence除咗同傳媒關係唔差，另一為人熟悉嘅，就係佢身兼輔警高級警司，有活動時可以兼任袁國強嘅「近身保鏢」。
Terence有得升職，原因之一係現時專責香港以外地區公共關係、以前做過商務及經濟發展局局長馬時亨新聞秘書嘅現任助理處長麥麗雲（Louisa），將於今個月中退休。Louisa個位將會由另一現任助理處長、做過民政事務局前局長曾德成新聞秘書嘅羅皓妍（Martha）調任，Martha個位則由第三位助理處長梁潤芝（Christine）調任，再由Terence接番Christine個位，名副其實係大執位。
至於律政司司長新聞秘書個位，就會由專責陪伴特首及三位司長出席大型活動、外號新聞處「行街隊」嘅首席新聞主任高素梅（Polly）升任。Polly之前曾駐新加坡，今年初先返港，咁快就有職升真係可喜可賀。