政情：中港大戰沈祖堯拒認輸
「中」「港」大戰曲終人散仍然拒認輸，唔好誤會以為講緊上周中國足球隊同香港足球隊嘅大戰，其實所指嘅係中文大學同香港大學最近數月嘅明爭暗鬥，套用足球比數術語就係前者輸緊○比二。事關中大醫學院推出新招「跳級制」吸納「尖中尖」計劃觸礁而回；加上港大盡攬大學聯招放榜嘅應屆狀元。面對變相取得「兩連敗」，中大校長沈祖堯仍未肯扯白旗認輸，死撐中大今年收生非常好，全港有一成最好成績嘅學生都讀中大，而早前中大醫學院「跳級制」討論亦唔會動搖學生揀讀中大嘅信心，一副自我感覺良好嘅模樣。
對今年收生滿意
為咗盡攬尖子，中大及港大每年均會龍爭虎鬥，今年唔止係咁，仲新增中大醫學院擬推出「跳級制」吸納「尖中尖」學生嘅「新戰場」。不過最終呢個如意算盤打唔響，皆因醫委會一度介入決定重新審視課程，中大醫學院焗住要暫緩執行，連帶早前港大公布盡攬十多名應屆狀元入讀，包括七人入讀港大醫學院。因此，中大難免予人屋漏兼逢連夜雨嘅感覺。
適逢中大尋日舉行新生入學典禮，據知中大今個學年取錄三千名學生，沈祖堯言談間都未見氣餒，一方面對收生覺得滿意，仲話中大除咗考慮學生成績，仲睇埋學生其他方面嘅表現；對於中大醫學院「跳級制」爭議，校方未來幾個月會再跟醫委會同教育局商討，有結果會再向學生同家長交代，連串舉動疑為「跳級制」翻案做好準備。
勉學子恪守尊重
沈祖堯其後又「拋書包」及回應學界具爭議嘅課題，佢首先引用論語，勉勵新生喺中大搵到做人價值觀同讀書嘅意義，其後又提及「尊重」呢個價值觀喺社會不斷流失，希望新生要尊重自己、他人及法律，先至可以贏到其他人嘅尊重。
對於特首出任八大院校校監嘅做法，沈祖堯表明暫時無迫切需要修改，強調有關做法已有一段歷史，亦寫喺大學條例之內，因此有一定作用同歷史意義。不過，中大學生會會長王澄烽批評，沈祖堯嘅講法唔合理，仲打算明年一月搞校內公投就呢個議題表態。正所謂「星星之火，可以燎原」，沈祖堯要有心理準備於未來數個月就爭議課題逐一「拆彈」嘞！