政情：易志明情繫電車撐到底
早前有顧問公司向城規會申請將電車趕出中區，引起社會極大爭議。航運交通界立法會議員易志明（Frankie）都極力反對，事關佢做過電車公司董事十幾年，直至六年前電車公司一半股權賣畀法國公司，佢先至退出管理，自稱對電車有極深嘅情意結。Frankie話，電車人均載客量多過巴士，車速亦可以快到每小時四、五十公里，批評想趕走電車嘅人完全冇數據支持喎！
早前我哋喺一個酒會見到Frankie，佢一輪嘴為電車辯護，話撇除歷史價值及集體回憶唔講，其實電車一啲都唔慢，若路面情況允許，車速開到四、五十公里都冇問題。不過，中環路段車速最多開到八至十公里，佢直言都唔知邊個塞邊個，點可以賴落電車度？佢又引用數據話，電車載客量多過巴士，證明係好有效益嘅交通工具。