政情：王淑筠搞慈善畫賽忘憂
近排股市狂冧加上經濟不景，好多人愁眉不展。家族做珠寶生意的「朱古力公主」王淑筠（Diana）都唔例外，事關佢接班打理的珠寶店開咗廿幾年，幾個月前因為業主加租一倍而被迫結束零售店，焗住搬上寫字樓。不過，幸好Diana最近忙於同香港保護兒童會（兒童會）合辦一場兒童繪畫比賽，期間收到一張張充滿童真嘅畫作，經過一輪評選後再將得獎作品印製成精美朱古力禮盒及布袋作慈善義賣，日日望住咁得意嘅畫作，望見就開心晒。
育有一對子女的Diana話，孩童純真嘅笑容最容易令人忘卻煩惱，所以早前佢同香港保護兒童會籌款委員會主席周瑋瑩傾起點樣籌款幫助兒童會時，決定舉辦一場「何謂愛」嘅兒童繪畫比賽。佢嘅一對子女都有參加，但就冇獲獎。Diana盛讚今次參賽嘅畫作水準好高，其中佢最鍾意嘅一幅畫係一家四口哈哈笑，望見就好自然會心一笑，呢批畫作下周二就會喺灣仔合和中心展出。