中環出更：港區閱兵團滋陰 抗熱各有法寶
數百政商界名人尋日朝早魚貫前往機場，準備上京參加今日舉行嘅紀念抗戰勝利七十周年閱兵儀式，原來好多人都滋陰唔捱得，個個有備而來，為「遠足」及「罰企」做足防備措施。卓妮仲發現，有多次上京經驗的保險界立法會議員陳健波，正午就抵達機場「check in」，但見佢企喺航空公司服務櫃枱前半小時有多，莫非他臨時被列入「黑名單」？
陳健波漏買機票
原來陳健波早前去咗歐遊廿幾日，因為途中出現溝通問題，佢以為政府好似以前咁代為購買機票，一心以為回覆乘搭邊班航機就可以起行。沒料到原來今次上京閱兵是要自行購買機票，所以就要即場支付六千多元購買來回機票，較平時大約3000多元票價貴咗一倍。不過，佢話難得有機會上京閱兵，就算貴都無辦法啦！
至於今日閱兵儀式，一班政商界名人要在清晨五時起床準備，落車後仲要「遠足」咁步行約一小時到閱兵現場，而閱兵就要「罰企」六至七小時。工聯會立法會議員黃國健就買咗一對千多元嘅氣墊波鞋上陣，佢話事後都可以着落區，企街站都唔使太辛苦喎。至於貪靚嘅議員葛珮帆就帶定太陽油、太陽眼鏡、平底鞋，務求唔會曬傷皮膚。
卓妮仲見到孔教學院院長湯恩佳一家幾口及金銀業貿易場監事長張德熙赴京，張德熙話帶咗把紙扇喺閱兵時撥涼。有人抵達北京後隨即收到官方紀念品及藥包，內有雲南白藥膠布、風油精、清涼油，仲有黃色雨褸及紅色袋仔，有乜頭暈身或損傷都唔使驚喇。
卓妮