政情：「銹刀」梁捉蟲 無咁易鬆

今次港大畢業生議會舉行特別會議，唔多唔少係由支持校方嘅校友一手促成，佢哋原先諗住提出「支持十大院長聲明」，幫手鬧吓班學生衝擊校委會會議，點知尋日九千二百幾張選票中，得一千八百幾票支持議案，遠遠未達過半數票而遭否決。反觀由港大校友關注組提交嘅五項動議，就分別獲超過七千票而通過，搞到港大畢業生議會要喺一至兩個月內成立工作小組跟進議案，仲對校委會造成好大壓力，真係愈幫愈忙，金刀梁真係多得佢哋唔少。

泛民校友出招煽動投票

有消息話，反對校委會陣營嘅校友前晚行動經過精心策劃，會場內有不少人手持一張投票須知，扼要地指示投票意向。而一批包括立法會議員在內嘅泛民主派核心校友早就喺會場內各有分工，包括不斷向在場校友打招呼及拉票，而會場內更有人負責發言煽動群情，亦有人負責在發言者發言時報以掌聲或噓聲以壯聲勢。消息仲話，力撐院長聲明嘅校友只得幾個人，有人發言時更被反方喝倒采，甚至被中止講話及粗言穢語人身攻擊。

做公職屢搞到一鑊泡

大家回一回帶，翻查歷史，可以發現金刀梁都唔係第一次咁黑仔，想當年佢仲做緊醫院管理局主席時，香港爆發沙士，醫管局被指抗疫不力、管理不善，金刀梁最終要黯然辭職，之後一度淡出公職行列。直至近年佢擔任標準工時委員會主席，同樣搞到一鑊泡，不時被勞方代表炮轟佢淨係識幫政府護航，無盡力逼政府就標時立法表態，委員會搞咗咁耐都唔見有咩實際成果，反而愈搞愈縮。

至於金刀梁擔任港大校委會主席，就更加唔使講喇，原本佢諗住做到年底就輕鬆走人，點知就臨尾香，副校長遴選一拖再拖，「等埋首席副校長」激發港大校友出來表態，依家校友嘅意見非常清楚，全世界睇住今個月舉行嘅校委會會議，睇下班校委係咪會否決陳文敏做副校長。雖然金刀梁尋日講明冇人可以對佢同校委會成員施壓，但會議無論結果係點，正反雙方定必再度交鋒，到時又有好戲睇，睇怕金刀梁會好頭痕。