政情：Greg蘇扮晒嘢 硬銷港旅業
天文台每周都會喺網上推出「氣象冷知識」節目講解天文現象，尋日推出「香港好地方」短片推銷香港旅遊天氣時，就請咗商務及經濟發展局局長蘇錦樑（Greg蘇）出鏡，同天文台科學主任楊漢賢齊齊玩轉地球。
短片一開始，扮天氣先生嘅楊漢賢報告完畢之後轉身而去，隨後由戴上黑超嘅Greg蘇粉墨登場。Greg蘇成個港產「007」咁款，全程冇對白，佢先係將氣象圖地球儀轉至香港，然後豎起大拇指讚好，然後又喺香港位置下方貼上「好地方」字條。Greg蘇扮嘢形象夠晒出位，吸引唔少市民透過《東網》點擊欣賞。
天文台指氣候宜人
其後楊漢賢喺短片中話，正如Greg蘇所堅持，香港確係旅遊好地方，有中有西，有古有今，有吃有喝，有山有水不在話下，四季景致亦各不同，永遠不會太冷亦都不會太熱云云。大家冇聽錯，楊漢賢確係話香港永遠唔會太熱，唔知今個夏天郁親都錄得攝氏三十幾度高溫天氣時，佢係咪咁啱出咗埠呢？