魔術師有「魔術托」，大家早就知道，醫師亦有「醫托」，你又聽過未？唔係講笑，今時今日無奇不有，香港真係有「醫托」呢樣嘢o架。
話說有位男子腿部受傷，喺公立醫院接受治療期間，懷疑有女雜工化身醫托，聲稱可以介紹「醫師」，更代為預約到觀塘一間工廈診症。事主聽佢講到該名「醫師」咁巴閉，行內享負盛名，連好多醫護人員都幫襯，於是抱住試吓無妨嘅心態應約前往，點知接受治療期間，疑被人猛力按壓大腿導致股骨頸明顯裂開，需即時入院做手術，結果要喺裂開嘅位置嵌入螺絲，留低六吋長疤痕。事後衞生署證實，該名所謂「醫師」原來係無牌經營。
咁就奇嘞，有人以「醫師」為名招攬生意，而且聲稱可以治療脊椎S形側彎矯正、椎間盤突出症、肩周炎、網球肘等等，點解衞生署一無所知？今次事主被「治療」到股骨頸裂開，下次萬一搞出人命，咁又點算呢？正如有立法會議員話齋，衞生署或警方往往接到投訴至做嘢，實在太被動，除咗應加強宣傳，提醒市民唔好上當，更應主動巡查掃蕩，唔可以次次等到出事至補鑊。
咁又係吖，家陣市面充斥大量非法醫療服務，尤其係涉及骨脊嘅治療，更係林林總總，五花八門，市民根本無從分辨，稍有不慎隨時中招，損失金錢事小，傷害身體事大。衞生署長期對呢啲亂象視而不見，見而不理，你話係咪靠害吖？好似呢位所謂「整脊治療師」，唔止打開門口做生意，仲有醫托到公立醫院招攬病人，直情當衞生署冇到。
其實，醫托呢樣嘢已經喺內地流行多年，佢哋多數喺大型醫院兜客，除咗主動向求診嘅病人搭訕，而且經常扮好心帶病人到串通好嘅診所或小型醫院，病人往往被誘騙以貴價購買劣質藥物，甚至被庸醫胡亂斷症，小病醫成大病，大病醫到冇命。早前內地傳媒放蛇，追蹤一個盤據北京近二十年嘅醫托集團，發現該集團人數多達七、八十人，對病人威逼利誘，無所不用其極。
香港實行「一國兩制」，以為冇呢啲亂象喇，點知原來醫托已經由內地靜靜入侵香港，而且專門幫無牌醫師拉生意，問你怕未。
見微知著，衞生署監管不力，導致亂象叢生，又點止醫托為患吖。就講醫學美容，當局放任自流，成個行業好似無王管咁，近年頻頻出事，甚至多次搞出人命。咪話功夫茶唔提醒，當局再唔加強執法，掃蕩無牌醫師，醫托遲早成行成市嘅咋。