空降做廣播處長嘅資深傳媒人梁家榮尋日履新，雖然佢話有信心面對維持港台編輯自主嘅挑戰，但對於港台節目《城市論壇》喺國教風波中擺空櫈事件，就似乎暗撐前廣播處長鄧忍光。當年有傳鄧忍光喺內部會議中，批評《城市論壇》喺討論國教風波擺空櫈，以示不滿教育局局長吳克儉同開展德育及國民教育科委員會主席胡紅玉缺席嘅做法。
對於空櫈事件，梁家榮諗咗十秒先回應，話港台並非首間擺空櫈嘅媒體，節目有時需要擺空櫈，但係事前一定要有充分理據，考慮係咪最能夠反映被放空櫈嘅人嘅態度，如果放空櫈出來嘅效果，係好似小朋友攞唔到粒糖而發脾氣，就非常大件事。佢仲話如果將來要喺呢類問題上做決定，又有份參與嘅話，一定與同事諗清楚，但就唔評論港台當日做法。
另外，梁家榮一邊話唔評論鄧忍光做處長嘅表現，但又話對方係非常出色嘅政務官，將來要向佢請教港台要面對嘅問題。一連串嘅講法，佢似乎好撐鄧忍光咁喎。當年鄧忍光以政務官身份空降，港台工會就以黑地氈相迎，如今梁家榮一上場就講啲咁嘅嘢，唔知港台工會又會唔會要佢行黑地氈呢？