政情：得番羅三七 學聯遲早執
佔領行動去年十二月以清場告終，領導整個行動之一嘅香港專上學生聯會（學聯）因為喺事件中進退失據，不但被社會各方譴責，更加失去學生支持，釀成多間大專院校退出學聯，令學聯潰不成軍。正當呢個風雨飄搖之際，曾經代表學界同政府高官談判政改嘅學聯五子，當中的前秘書長周永康、前副秘書長岑敖暉、前常委梁麗幗及鍾耀華，竟然完全放手唔理學聯事務，拍拖嘅拍拖、返學嘅返學，由得現任秘書長羅冠聰自生自滅。
岑敖暉顧拍拖
自從佔領行動之後，學聯領軍人物幾乎絕迹政界。一早講明會重返校園生活嘅秘書長周永康，完全無喺學聯活動中亮相。雖然岑敖暉都會去吓六四晚會同七一遊行，但都表現得好低調，大家除咗間唔中可以喺社交網站見到佢同女友何潔泓放閃光彈、攬到實一實大晒恩愛之外，都鮮有評論政治議題，對於學聯佢當然係愛理不理啦！
鍾耀華忙搵銀
至於本身係港大校務委員會成員嘅梁麗幗，都喺近日港大校委風波之後先現身公開場合，但港大事件都足以令佢一頭煙，睇嚟佢都唔會點理學聯事務喇！其實仲喺中大讀緊書、延遲咗兩年都未畢業嘅鍾耀華應該係最得閒嘅一個。不過，據聞佢竟然走咗去新媒體做記者搵外快，書都未讀得掂，仲要分心搵錢，莫講話理學聯，真係畢唔畢到業都成問題。個個闊佬懶理，咪搞到依家得番羅冠聰一個人做幾個人嘅嘢囉！
學聯喺佔領行動全盛時期，領導層孭住學生代表之名，連港府也視之為主要談判對手，泛民主派更加要聽佢哋意見，甚至令泛民靠邊站。不過，依家學聯四名「老鬼」愛理不理，自己做自己嘢，相反以三十七票當選秘書長嘅羅冠聰政治能量又唔夠，經常都被人謔稱「羅三七」，學聯到依家可以話係潰不成軍，恐怕摺埋都係遲早嘅事。