中環出更：「政協秘書長」誘騙陳恒鑌
近期電話騙案急增，騙徒十分猖獗，本身係安徽省政協委員嘅立法會議員陳恒鑌（Ben）早前亦都收到詐騙電話，對方聲稱係安徽省政協秘書長，話近日頻頻來香港交流「使大咗」，想問阿Ben可否幫手填番個「缺口」，仲話想升阿Ben做政協常委添！不過，阿Ben聽到對方一提到錢銀就即刻醒水，婉轉咁收咗對方線，冇做到「水魚」。
稱幫手填氹可升政協常委
阿Ben話，來電者自稱係安徽省政協秘書長，仲一開口就話想升佢做常委，又懶熟咁問候佢助手。因為阿Ben冇同過秘書長傾電話，所以根本不知真偽，惟有禮貌咁問句有咩可以幫到手。點知對方一聽到呢句就露出狐狸尾巴，話因為最近招待啲人來香港交流，所以用錢用多咗，有個「缺口」，問阿Ben可唔可以幫手，換言之想叫佢科水「填氹」，似乎對方係諗住以升職利誘阿Ben。
阿Ben尋日就同黨友就電話騙案問題同保安局局長黎棟國見面。佢哋引述政府數字，話單係七月已經有八百幾宗假冒內地官員嘅電話騙案。阿Ben話，其實唔少詐騙電話都係內地致電香港，所以該黨下星期會去同廣東省公安廳官員見面，商討點樣加強兩地合作，打擊騙案。
卓妮