中環出更：傑出女商 曉惜食 鈴助人
城市女青年商會每年都選出多名形象健康及對社會貢獻良多嘅傑出事業女性，商會今年再接再厲舉辦第五屆全港時尚專業女性選舉，得獎者包括香港僑界社團聯會主席陳有慶孫女陳曉鈴（Stephanie）及香港島婦女聯會主席張雅麗等。Stephanie話，港人物質生活豐富，好多嘢得來太易，冇諗過食物來源珍貴，因此經常浪費食物，所以佢引入社企改善有關問題。
話說Stephanie十幾年前經阿叔，行政會議成員陳智思介紹下認識安老事務委員會主席陳章明，即係佢參加今次選舉嘅提名人。陳章明認為，長者喺社會上容易畀人負面感覺，但其實現時好多長者都受過高等教育，有條件過高質素嘅退休生活。四年前Stephanie留學返港後，就諗到開設「永健坊」呢個同時提供進修及休閒享受嘅長者生活空間，又引入日本社企，捐助窮困或有需要兒童。
陳章明靠WhatsApp尋子
對於時下好多年輕人都鍾意篤手機，Stephanie就話好珍惜家庭聚會時間，食飯時唔使父親出聲，都自動自覺擺低手機。相反陳章明就大呻要以WhatsApp先可以搵到個仔，又試過難得一齊食飯，卻各自做「低頭族」，搞到佢忍唔住出聲話：「不如你哋聽吓老竇講嘢啦！」
同場仲有去年得獎者名媛何倍倩（Anina）及其提名人時裝設計師何國鉦。Anina話，早前忙住幫個仔搵小學，前前後後一共去咗十幾間學校面試，其中一間仲要見四次咁多，連丈夫都忍唔住講笑，話見工都未試過見咁多間。而身旁嘅何國鉦，雖然未有仔女，但就有好多朋友搵佢幫手搵學校，因為佢早前幫母校培正做校慶籌委，令好多朋友得知佢係培正校友後，電話就開始響個不停喎。
卓妮