政情:貴九毫九 楊全盛失政府工程

政府「價低者得」嘅招標政策一直為人詬病,除咗影響受聘員工嘅待遇同產品質素,最直接嘅影響就係做爛市。好似香港軟件行業協會會長楊全盛(Eric),最近就因為九毫九輸咗單政府工程,真係唔知好嬲定好笑。

對手出動「一仙」

政府早前就電子文件管理系統工程進行招標,底價係一百四十萬元,Eric出價一百四十萬零一元,本來坐定粒六諗住實中標,點知有人竟然出價一百四十萬零一仙,最終Eric以九毫九之差失落呢單工程。佢話,最激氣嘅地方係呢間唔係本地公司,但竟然都知道呢個玩法。至於中標公司點樣畀一仙出嚟?佢話透過支票或銀行過數都得,笑言真係畀現金都唔知點找錢。

講開創新科技,Eric就話之前聽過有間公司向政府推介救山火嘅機械人,可惜政府以參考資料不足而拒絕。呢間公司嘅負責人後來向內地紙廠推銷,結果大獲好評,兜咗個圈之後政府又搵番佢。其實如果個發明係前無古人,又點會有咁多參考資料呢?政府真係搬舊石頭責自己隻腳。

第一手消息請下載on.cc東網iPhone/iPad/Android/Windows Phone Apps