政情：黑材湯冇人敢幫襯

搞溫和平台 無人問津

聽聞除咗民主黨、公民黨畀面，勉強同Ronny會面應酬之外，建制派同商界都唔將佢放在眼裏。相信除咗因為所謂嘅中間路線不倫不類之外，最重要嘅問題在於湯家驊本身。

湯家驊過往屢次被爆僭建、利益衝突等醜聞，甚至連今年六月辭任立法會議員時，都出現交錯辭職信嘅「甩轆」笑話，將原本應該交畀立法會秘書處嘅辭職信，錯交畀立法會主席曾鈺成。做咗多年議員連呢啲規矩都唔識，真係令人搖頭。

曾被揭僭建及利益衝突

講起Ronny嘅醜聞，可謂多不勝數。早喺二○一一年，其位於大埔康樂園嘅獨立屋寓所被發現懷疑僭建玻璃屋，身為資深大律師嘅Ronny當時強辯稱，按有關案例，佢加建嘅玻璃屋屬豁免範圍。詎料此番說詞旋即遭法律界人士批評有錯，Ronny先至承認一時記錯案例，立即向公眾道歉，並承諾拆走僭建物。然而事隔一年，其大宅後園又再被發現有已填平嘅豪華泳池，懷疑曾經僭建。佢又辯稱係上一手業主留下，其後由佢將泳池填平。

除此之外，Ronny最廣為人知嘅醜聞莫過於「漏報風波」。三年前其被踢爆任職議員期間，未有向立法會申報持有多間本地及海外註冊嘅公司。該等公司原來用作持有物業、基金、股票及高爾夫球球會會籍等資產。任職議員多年又身為律師嘅佢，竟然聲稱以為不用申報，實匪夷所思。

咁仲未夠，據聞Ronny仲有黑材料被人掌握於手，試問仲有邊個敢理佢，惹麻煩上身？