中環出更：「馬婓深」下台 團體示威甩轆
香港大學校務委員會周二決定繼續「等埋首副」，大批學生佔領會場、「禁錮」校委，引來社會關注。有團體一連兩日去港大請願，要求校長馬斐森下台兼鬧爆學生唔好好讀書。不過，呢班示威者「有口話人，冇口話自己」，佢哋手持嘅示威標語有唔少錯字，例如「禁錮」變「禁固」、「做媒」變「做枚」，就連港大校長「馬斐森」都變成「馬婓深」。睇嚟要認真讀書嘅唔單止係學生，呢班示威者得閒都應該睇番啲書喎！
「家長」標語錯字百出
尋日出動嘅示威團體共有四十多人。為咗表現自己嘅學養，佢哋放棄傳統口號，反而叫嚷「士可忍、孰不可忍」。佢哋又批評馬斐森領導無方，縱容學生，促革除佢嘅校長職務。問到佢哋同港大有咩關係，佢哋就只係騎呢自稱係「家長」。
講到標語錯字百出，一名自稱趙子龍嘅行動組織者倪志榮仲好自豪話，示威標語係佢一手一腳創作嘅，認真搞笑。
卓妮