中環出更：鐘錶界宴賀孫秉樞「九十後」
零售市道持續淡靜，鐘錶業正捱緊寒冷嘅暑假。香港鐘表業總會（總會）一班業界翹楚一於暫忘「痛楚」，早前搞咗場溫馨壽宴為總會永遠名譽會長孫秉樞慶祝九十歲生日。當晚節目高潮係壽星公翻箱倒櫃，以珍貴舊相製作一段跨越九十年嘅紀錄片，睇到大家回味無窮，亦體會到健康重要過財富，一時經濟不景又何必介懷？
當日逾三百名業界老中青齊去賀壽，包括東方表行創辦人楊明標、總會主席張繼東及三位靚女副主席黃麗嫦、徐珊雯及黃雅芝，仲有總會前主席高鼎國及梁青華等人。唔少新加坡、內地及台灣業界好友專程到港，齊賀孫秉樞成為「九十後」。
莊學山盼青少懂感恩
中華總商會副會長莊學山亦有到場，講起佢有份籌建嘅慈山寺情況，佢話開幕以來市民預約入寺好踴躍，佢哋亦邀請唔少中小學生入場參觀。近年香港社會嘈嘈吵吵，莊學山鼓勵大家入寺令個心清靜下來，細心欣賞周邊環境及學識感恩。
好似早前佢哋舉辦四日三夜嘅學生營，第一時間收起學生嘅手機，要求佢哋同人傾偈交流，感受旁人及自我。為保慈山寺清幽環境及避免擾亂村民寧靜，市民入寺仍需預約。
青年工作係當前熱門嘅字眼，高鼎國亦好關心港青，最近佢帶一班學生到寧波等地參觀實習。為免行程變成旅行團，故安排好緊湊紮實，佢亦會喺夜晚同港青傾偈，行程為期五星期，而佢就陪足十幾日，算係有心。
卓妮