《太陽報》報道，一年一度的香港書展日前結束，書香背後，原來參展商丟書無數，新書慘變垃圾！
股票市場有所謂「創傷後遺症」，估唔到書市亦有「展後創傷後遺症」，據悉與近年貨倉租金愈來愈貴有關，與愈來愈多書商無法承擔貴租儲存書籍有關。早一排老朽亦收到出版商電話，話十多年前寄售之書在貨倉，因租貴難儲藏太多貨，叫老朽有空去搬走，想起文藝青年時的少作落得如此下場，不聽前輩「文藝窮三代，搖滾毀一生」的忠告，落得如此不堪，真想買塊豆腐，一頭撞死算了！
之不過，又諗起有人話，最好嘅文學藝術都係悲哀嘅，第一流嘅天才亦是悲哀嘅。叔本華說：天才所以伴隨憂鬱的緣故，就一般來觀察，那是因為智慧之光愈光明，便愈看透生存意志的原形，那時便會了解我們人類竟是一副可憐相，便油然興起悲哀之念。所以史湘雲同林黛玉合作寫出了「寒塘渡鶴影，冷月葬詩魂」的悲哀詩句。
如今眼見書展後，一堆堆無價知識變垃圾，比同文所說的「散貨場」更不堪，這些「知識寶庫」、「啟迪人民心靈」嘅書，或回收或去堆填，當真是「堆填渡雀影，冷月葬書魂」，使老朽這個泥古不化嘅愛書人，為之泣數行下！不是本報記者的深入報道，老朽勢估唔到書展咁有文化、咁有意義，竟然變成如此觸目傷心嘅垃圾場！
朋友唔信香港係文化沙漠，問老朽點睇？老朽只能搬出官腔：見仁見智喇！呢四個字係無能高官最鍾意用嘅四字詞，皆因答咗等於冇答又可顯出灑脫一面。香港是否文化沙漠，睇吓書展後遺症、望吓西九文化區就知喇！西九「發展」至今依然是腐草對流螢，其ＣＥＯ無論走馬上任，全球聘請，請來請去都係洋總裁，香港文化，如果有——都係崇洋媚外！若斬多四両，頂多加埋漢奸文化。