政情：臨別互笠高帽
香港工業總會下星期就換屆，主席劉展灝（Stanley）尋日臨別秋波，回顧任內工作及展望未來香港工業發展情況。佢話喺工總咁多年，係時候退落嚟，又指工總內部一向有優良傳統及共識，每兩年一屆主席唔連任，笑言自己由第五副主席開始排到主席期間做足十二年都冇人「跳船」，亦冇得跳級，而好多工總夥伴都共事咗十幾年，部分更已經成家立室。
「人才」「好老闆」相稱
Stanley透露，本來諗住卸任後抖多陣，點知政府上月又委任佢七月開始做生產力促進局主席，由於生產力促進局嗰邊都好多佢工總嘅好拍檔，所以佢亦即時接受，繼續發揮經驗為業界効力。
對於工總行政總裁蘇家碧（Linda）將於九月過檔港鐵，Stanley就感慨「人才即係人才」。Linda就好感激一直以來都遇到好老闆，認為劉展灦為人非常友善，而佢完成今屆手頭工作後亦會待新一屆工作安頓好後才離開，稍後佢會與家人去克羅地亞旅行，放假輕鬆吓先再返新工。