「等埋發叔」嘅甩轆事件唔止喺政改方案表決時發生，連區議會都有類似事件上演。話說元朗區議會交通運輸委員會尋日就因為差一位議員先夠會議法定人數，結果流會收場。而喺流會已成定局先趕到會議室嘅區議員莊健成就同「等埋發叔」事件主角、立法會議員劉皇發同屬經民聯，認真巧合。
交委會朝早九點半開會，開到一點幾時，工聯會區議員姚國威突然發現會上法定人數不足，要求點人。同佢同屬工聯會嘅委員會主席陸頌雄就宣布休會十五分鐘，以等候有足夠議員返回會議室。
不過，十五分鐘過後，會議室仍欠一位議員先夠人，陸頌雄惟有宣布流會。而莊健成就喺流會後三分鐘先趕到，同發叔喺上月政改表決後先趕抵立法會同出一轍。
姚被問到點解要點人數時話，議程一直係主席安排，但已經開到一點幾，主席又唔講幾時食晏，而且會議室的確唔夠人，所以就點人數喎。