中環出更：豪撐3D產業 打印錢途
香港電子業商會（下稱商會）尋日舉行周年大會改選新一屆會董，原任副會長、信佳國際集團主席吳自豪當選新一屆會長，接替做咗兩屆會長嘅「耳機大王」楊志雄（Johnny）。吳自豪話，今年商會將因應發展如火如荼嘅3D立體打印市場，在旗下增設「三維打印業協會」，以推動發展此新興行業，助業界尋找新商機。
吳自豪話，現時商會旗下已有半導體行業協會一個屬會，3D打印業將係第二個屬會。
市場龐大 教育為先
卓妮見仁濟醫院副主席馮卓能（Clement）都在場，原來佢同拍檔趙舜培就係3D打印業協會嘅發起人。Clement話，3D打印產品大至房屋汽車，細至家用杯碟，市場好龐大。不過，由於市場啱啱起步，所以佢哋正由教育着手，目前已喺幾間中學展開。
講到工業發展，業界總係批評政府做得唔夠。立法會資訊科技界前議員譚偉豪都話，政府成日被立法會拖住後腳，所以一直做唔到嘢，令愈來愈多提供創業資金嘅外國「天使投資者」寧願轉投鄰近嘅深圳，因此希望政府投放多啲資源，搞多啲配套以吸引業界投資。
卸任嘅Johnny就趁機批評資訊科技界議員莫乃光漠視業界需要，拖足三年仍未能爭取到成立創新及科技局。
工業界「多億萬富豪」
金山工業集團董事總經理李耀祥及時捷集團主席嚴玉麟兩位副會長都有到場，講到時下年輕人唔知想做乜，太辛苦又唔肯做，佢哋認為後生仔應該改變諗法，其實做工業都好有「錢途」，笑稱現場有好多億萬富豪喎！
卓妮