政情：名人義唱 廟街試咪
為協助露宿者，香港牙醫學會會長梁世民（Sigmund）近日就搵埋醫學會前會長謝鴻興、律師會前會長王桂壎及建築師學會前會長鄺心怡，將於九月九日晚上喺廟街開咪。廟街出名臥虎藏龍，踩場賣唱，幾位新舊會長戰戰兢兢，日前走去廟街試咪做準備，順便打個招呼。
街坊金曲 打成一片
試咪當晚，檔主爽快借出音響配合，Sigmund話，估唔到廟街人好友善，彼此交流唱歌較技，打成一片。有檔主們知道佢哋為慈善義唱，樂意租出檔位畀佢哋唱一晚。首次喺街頭賣唱，謝鴻興坦言好大壓力：「咁多對眼望住你，唱得唔好，唔夠大聲，實被人掟番茄！」Sigmund就話，為免曲高和寡，選曲時專登揀啲耳熟能詳嘅金曲，等街坊聽得更投入。
當晚不設賣飛，街坊可以隨緣樂助。不過，為免擾人清夢，Sigmund打算唱到夜晚十點半就收檔，預計唱一晚可以籌數萬元，雖然金額唔算好多，但足夠買啲食物為露宿者打吓氣喎。