政情：何健華入工總要忍口

據聞政府批准Arthur打呢份工，但對佢處理涉及退休前負責嘅相關政策事務有所限制。如果呢啲禁忌包括佢之前任職政制及內地事務局副秘書長時負責嘅特首選舉工作，咁後年特首選舉時，Arthur真係要忍吓口，事關好多工總會員係選委，佢千祈咪同工總中人吹水講選舉喇！

退休即接替蘇家碧做總裁

前高官出身嘅Linda九月十六日將過檔港鐵搵真銀，出任年薪高達三百四十八萬元嘅公司事務總監。Linda喺工總只做咗三年幾，初初半年時間「屈就」做住工總總經理先，因為要捱完高官再就業過「冷河期」，直至二○一三年初先至坐正做總裁，期間就由時任工總主席鍾志平及副主席劉展灝輪流做「署理CEO」。點知啱啱過咗兩年幾，今年三月即傳出Linda被錯漏百出嘅港鐵高薪挖角。經過Linda一役，工總曾對前高官怕怕，但幾經掙扎，都係「情迷」前高官。

做咗公務員卅七年嘅Arthur一二年由政制局轉任律政司，去年五月退休，扣除離任前休假，查實到今年五月先至正式退休。所以雖然政府基本上批准佢出任工總總裁，但例牌對佢處理涉及退休前負責嘅工作設限。律政司政務專員只係處理一般行政工作，故此講緊嘅應該係三年幾前喺政制局嘅工作。

任內曾處理上屆特首選舉

Arthur喺政制局任內處理嘅多數係政治問題，包括上屆特首選舉，照計同工業界組成嘅工總業務冇乜衝突。不過，咁啱後年將舉行特首選舉，政改被否決後，一切打回原形，特首都係由一千二百名選委投票產生，而工總唔少成員都曾經係選委，來屆好大機會都繼續爭取做選委，所以Arthur都係避談選舉好啲。