建制派陣營板塊眾多，但最「短命」嘅可以話係商界同專業界別，過往就組織過唔同牌頭嘅聯盟或組織，但似乎除咗自由黨外無一個可以「長命」過四年。有商界中人分析，現時立法會內手握七票嘅經民聯，來屆面對多個危機，隨時出現骨牌效應「冧檔」。
經民聯現時有七位議員，大部分有危機。先講「商界」香港總商會代表林健鋒，佢自從喺建制派政改表決世紀甩轆事件後，唔止形象失分，領導能力亦備受質疑，喺總商會地位將受動搖；加上佢做足三屆議員，被換走機會大增。
第二大隱憂來自鄉議局代表劉皇發，發叔年事已高，鄉議局主席已由其子劉業強「世襲」，雖然劉業強係經民聯黨員，但佢係咪可以順利接埋發叔個立法會議席，真係世事難料。
至於金融服務界張華峰，雖然喺業界地位崇高，呢幾年亦好落力協助業界，但佢今屆只係險勝對手李君豪六票，聽聞李君豪來年密謀翻盤，再加上新民黨張德熙有可能加入戰團，張華峰要坐穩個議席都唔係咁易。
而經民聯唯一直選議員梁美芬，雖然每次選舉都獲「祝福」，但九龍西選區下屆增加一席，勢必引來政黨大混戰，對佢未必有利。至於議席較為穩陣嘅地產建造界石禮謙，佢向來同經民聯關係「有名無實」，分分鐘轉投其他政黨懷抱。
反而最穩陣係工業界梁君彥及工程界盧偉國，暫時睇唔到有強勁對手，業界亦無聲音要換人。但心水清嘅人會記得，其實建制派之中嘅商界同專業界別，一向處於離離合合嘅鬆散狀態，由早年泛聯盟，再變成專業會議及經濟動力，之後又衍生出經民聯，到底下屆立法會又使唔使再改名呢？