中環出更：英作家少用社交媒體
上海灘創辦人鄧永鏘爵士喺近年書展都會邀請英國作家來港演講，推廣英國文化。今年佢就搵咗英國前首相戴卓爾夫人女兒Carol Thatcher、艾倫狄波頓及Simon Sebag Montefiore，尋日仲安排同傳媒見面。一班作家被問及會否上網用社交媒體時，唔知係咪唔想倒自己米，聲言唔多想用，都係想叫人買番實體書喎。
艾倫狄波頓話，社交媒體知道點樣令人感到滿足，好容易令人上癮，但認為人類進化嘅腦袋唔係用嚟適應社交媒體，就好似腦袋唔係用來處理色情、糖及鹽等，皆因呢啲係不公平刺激（unfair stimulus）。
Carol就話有次搭飛機見到一個小朋友，一手拎住平板閱讀器，一手揸住小說，覺得科技最影響小朋友成長。依家有唔少人用手機或電郵溝通，只會打縮寫，好少會寫完整句子，所以佢希望可以推廣多寫完整句子。
Simon則認為人類最深層次感覺就係想被愛，所以社交媒體係無可抗拒，亦都擔心啲人唔讀書、只上網。咁點樣抗拒上網？佢話每日喺寫作完成後，只會花一小時上網，但已覺得係浪費時間。
丁新豹自爆係西關大少
除咗寫小說或傳記外，今年唔少作者都撰寫香港本土歷史。今年有份寫書嘅歷史博物館前總館長丁新豹尋日亦有出席講座，大談成長故事。佢自爆喺廣州出世，可以話係「西關大少」，但就「落難」來港。讀書時期佢就生長喺「聯合國」學校，同學中有來自葡萄牙、英國、日本以至南美洲國家圭亞那。自從○六年退休後，佢話仲忙過返工，足足寫咗八本書，雖然依家研究緊街道命名史，但就唔打算出書住，諗住去旅行休息吓先。
卓妮