一石激起千重浪，政改方案表決時發生建制派「世紀甩轆」事件，近日逐漸浮現連鎖效應。雖則操盤人無講明對建制派作出懲罰，但部分建制派政黨嘅地區人士都可能「心中有鬼」，最近都刻意同所屬政團切割，無論係搞活動或派發宣傳單張，都唔敢再用政黨牌頭，避免政黨色彩過濃，似乎建制派都幾擔心政改「甩轆」事件會影響年底區議會選情。
經民聯過去三年一直喺唔同地區「收購」多位區議員，但自從「甩轆」事件後，佢哋唔少區議員出席活動時，都避談經民聯三個字，好明顯係想劃清界線。雖然無可靠數據證明「甩轆」事件會影響建制派支持度，但始終年底即將舉行區選，而「甩轆」事件兩大主角正正就係經民聯兩位立法會議員劉皇發同林健鋒，如果區議員打正旗號參選，始終擔心會流失唔少選票。
呢個割席現象唔止出現喺經民聯，就連工聯會都有類似情況。聞說部分工聯會社區主任搞活動時，都盡量唔用工聯會嘅牌頭，避免被街坊問起點解工聯會咁多議員在政改方案表決時無投票，只係得陳婉嫻投票。
其實工聯會內部都認為今次事件對佢哋好傷，所以對社區主任唔用工聯會牌頭，可以話係隻眼開隻眼閉。