政情：公民講場：AV仁長毛獲放生 阿王嬲到爆

早前有報道話兩名立法會議員，包括民主黨何俊仁（AV仁）及社民連梁國雄（長毛）前年向法院申請司法覆核特首選舉結果，被終審法院駁回，仲要支付二百多萬元訟費，但點知兩人喺今年突然清還訟費，被人質疑係咪收受不明來歷嘅捐款。工聯會議員王國興（阿王）睇唔過眼，上月底去信立法會議員個人利益監察委員會（議監會）投訴二人無按規矩在十四日內向秘書處申報收到捐款。阿王尋日主動爆料話，議監會因為無任何跟進資料同證據，決定唔再跟進喎。阿王愈講愈嬲，批評議監會「放生」兩人，竟容許佢哋「走法律罅」唔使申報，又話如果手上有證據，一早去咗廉政公署舉報啦！