政情：趙式浩唔介意做「維園阿哥」
建制派喺政改方案表決大甩轆，自由黨五票支持袋袋平安之餘，該黨青年團亦加入抽水，招收「神一般隊友」，最近就招收咗趙世曾二子、卓能集團非執董趙式浩（Howard）加入。Howard對土地規劃、房屋政策有興趣，表明唔介意追隨青年團主席李梓敬做「維園阿哥」發聲，但暫時無意參政。不過，Howard家姐趙式芝早年先「出櫃」，細佬轉個頭加入反對同性婚姻嘅自由黨，似乎同家姐對着幹喎。
Lady M老闆加入青年團
除咗Howard，另一大有來頭嘅黨友仲有近期全城熱捧嘅蛋糕店Lady M老闆吳丹（Tammy）。Tammy笑言，開店後幾乎人人問佢攞蛋糕，佢亦好識做咁請黨友食。其實Tammy早於一二年入黨，一直為黨度橋設計宣傳品，唔知早前該黨以勝利者姿態上載「豬頭相」，寸爆建制派「人蠢冇藥醫」嗰張強帖又係咪出自Tammy手筆呢？