政情：早聞燶味 德熙嘆沽得唔夠狠
中港股市近日急瀉插水，唔少散戶幾日輸得傷亡慘重。有三十多年炒股經驗嘅金銀業貿易場監事長張德熙（Haywood）就避過一劫，個多月前將倉內七成股票沽出，獲利一半。及時「走鬼」，非因未卜先知，而係睇見傳媒早前不停吹噓散戶如何月賺數十萬元，佢話全民皆股，必是股災先兆喎。
全民皆股 重挫先兆
經歷多次股災，Haywood步步為營，個多月前喺高位沽貨，看似未「食到盡」，但近期股市插水，回頭一想咪話唔驚。佢直言早前A股升到唔識停，佢已擔心升市係「虛勢」，加上唔少人索性辭工全職炒股，心中響起警號，股災必近矣。「七三、八三、八七股災都係咁，大跌前總會營造一種全民皆股，人人執錢，唔炒你就執輸嘅氣氛。」Haywood慨嘆唔夠狠：「我應該將其餘三成貨都沽埋，就係衰貪心，唔夠狠心。」佢又話怕沽期指風險太高，唔敢亂沽，但依家就等撈底。