立法會議員湯家驊早前退出公民黨（公文袋）兼辭去立法會議員職務，導致其新界東議席需要進行補選，現時公文袋屬意由楊岳橋（Alvin）接班，但民主黨（白鴿黨）前中委黃成智又話考慮緊參選，倘若成事，成智同Alvin將會嚟一場鬼打鬼激烈火併。
新界東議席補選係單議席單票制，若泛民未能協調一人出選，就會分薄票源。據聞成智同人講，話冇理由泛民仲講「接班」，家陣唔係話欽點，如只係讓路畀公文袋，變咗係迫泛民支持者淨係可支持公文袋。
加上Alvin係新人，入到議會要熟習《議事規則》，幾個月時間根本唔可以做到啲乜，所以成智覺得應該畀多個機會啲選民選擇。至於泛民係咪應該搞初選，據聞成智計過自己初選勝算不高，冇理由陪跑，所以真係出選嘅話就會用獨立身份，唔會玩初選喎。
成智下周面對黨中委「審判」，討論佢發起「袋住先」聯署涉嫌違反黨紀。聽聞佢已去信中委會重申最終煞停聯署，無真係違反黨紀，黨內有聲音認為唔應該對創黨黨員咁盡，係咪會被踢出黨仲係未知之數。如成智有得留低，佢又會否為出戰補選而退黨？