政情：牛市加把口見熊即走
經歷三個月美好時光，恒指由四月底高位沖上二萬八千五百點，到上個月開始急跌至二萬六千點水平，近兩日仲合共狂瀉二千幾點添，通街股民成手蟹貨。過去三個月，港交所行政總裁李小加不時好似財經演員咁唱好港股，據聞港府高層都對佢「多嘢講」有微言，覺得佢身為港交所高層，唔應該火上加油高調唱好。現時港股插水式下跌，李小加又突然隱晒形，究竟搞乜呢？
股仔亂舞唔健康
其實港股過去三個月由「大時代」變成「熊來了」，港府官員每逢回應傳媒時都好小心謹慎，因為佢哋明白到政府一句說話，隨時被演繹為入市訊號，所以唔會亂講嘢鼓勵人入市。不過，有港府高層認為，呢幾個月李小加就似乎唔係好守規矩，不停唱好港股，一時話港股大時代未見頂，一時又話A股係世界上最透明市場。
據聞港府財金官員愈聽愈覺得唔對路，佢哋嘅判斷係港股基本因素喺過去數月其實無變，按道理恒指唔應該無端端被推高至二萬八千點水平，即使未來推出深港通，亦唔代表大量資金流入本地市場，所以部分細價股無喇喇被炒起，仙股升格至毫子股，其實好唔健康。政府內部漸漸想制止李小加言論，以免炒到癲晒嘅股市更瘋狂。
對比以往港交所高層，例如前行政總裁周文耀甚少評論股市動向，就知道李小加真係幾多嘢講。即使港交所高層有重要事項對外宣布，通常都由港交所主席代言，例如現任主席周松崗或前主席夏佳理等。李小加喺牛市時就高調現身，熊市時就唔見咗人，到底佢搞邊科呢？大家可以自行判斷。
港交所CEO揸重貨
話時話，李小加今年剛剛續約，除咗年薪高達九百萬元外，手上仲持有近六十萬股港交所，就算以尋日收市價二百零三元四毫計算，總值都達一億二千二百萬元，如果股價稍升幾個價位，佢荷包真係漲到不得了。