中環出更：鄰座音波功 逢國裝App量分貝
部分泛民主派立法會議員經常喺會議廳發言時好大聲，以為大聲就可以嚇到人，但坐喺鄰近嘅議員就大呻耳仔長期受罪。其中體育、演藝、文化及出版界議員馬逢國尋日就特登下載手機應用程式，量度隔籬位范國威（Gary）發言時嘅音量，結果高達八十四分貝，相當於一架火車高速駛過嘅聲浪。
坐近叫囂四人組 憂耳仔失聰
馬逢國喺會議廳被安排同Gary、梁國雄（長毛）、陳偉業（大舊）及陳志全（慢必）坐埋一堆，但佢哋經常突然大聲叫囂，令馬逢國好煩躁，試過頂唔順要走出會議廳避難。又試過佢哋幾個被保安抬走時，馬逢國更加要移開驚受牽連，更加笑言擔心自己嘅職業安全，會唔會一邊耳仔失聰咁話。Gary就力撐自己講嘢唔大聲，話既然馬逢國咁關注自己健康可以申請調位喎。
立法會前主席范徐麗泰早年就試過擺個分貝機喺會議廳量度噪音，當時范太曾經提醒長毛發言時超過八十分貝太大聲，長毛更因此而道歉。今時唔同往日，當向官員掟嘢都係小兒科時，講嘢大聲又算得係咩吖？
卓妮