中環出更：百年老字號 專森做中藥
香港潮流變變變，不斷湧現新品牌，但中藥界仍有一班百年老字號掌舵人，默默守護金漆招牌。香港藥行商會日前舉行七十七周年會慶及理監事就職禮，各大知名中藥品牌揸Fit人聚首一堂，交流喺困境中嘅守業心得。創業難，守業更難，好似藥行商會首席會長潘寶森（Sam），係「保嬰丹」第二十二代傳人，佢本身做傢俬生意，二○○○年才接棒家族生意，作出不少犧牲。
Sam話，先祖係明末太醫，家訓好嚴，講明掌舵人只可一條心做中藥，唔准百足咁多爪，染指其他生意。背負一個擁有三百四十多年歷史嘅品牌，壓力都唔小。Sam坦言，自接手家族生意後，花了兩年時間去改革，唯一不變係堅持喺觀塘設廠，支持本地中藥發展。
王老吉傳人 樂見新一代唔怕「涼」
和興白花油藥廠主席及行政總裁顏為善都話，守護家族品牌不易，其中一個挑戰係仿冒太多，佢寧願將藥廠設在柴灣，方便監控品質。同場仲有涼茶世家「王老吉」第五代傳人王健儀，佢自幼喺灣仔涼茶舖長大，真係瞌埋眼都識執藥，亦難忘○三年沙士爆發期間，涼茶日日掃清光。佢樂見年輕一代對涼茶唔抗拒，而家中兒子亦願意接手生意，邊做邊學。
當晚就職晚宴，席間唔少中成藥品牌老闆向立法會批發及零售界議員方剛大吐苦水，批評政府過度規管中藥界，扼殺行業生存空間。藥行商會理事長黃炳明話，雖然當局話支持發展中藥港，卻因管制嚴苛，令中成藥產品不增反減，由十二年前約有一萬六千多種，跌至近年只有萬零種，估計未來幾個月有更多品牌因註冊唔到而「執笠」，認真無奈喎。
卓妮