逆市「撈貨」 專家：最緊要冷靜
【本報訊】儘管港股跌勢勁過跳樓機，惟不少散戶「心口有個勇字」，有證券行分行經理透露，昨日早段十個散戶有七個撈貨，可惜下午跌幅顯著擴大，部分散戶即時「中伏」。
英皇證券荃灣分行經理高初定說，昨日港股顯著低開，但不少散戶竟然撈貨，詎料下午恒指一度暴瀉逾二千點，散戶即被嚇到嘩嘩聲。點解散戶「咁夠薑」？他解釋：「唔少中資股近日閒閒地跌一至兩成，好多見慣風浪嘅散戶覺得好抵買，所以分段撈貨，策略係贏就先走一半，輸就長揸」。
散戶仍信阿爺會出招托市
專業投資者胡李察指出：「我用250萬元買入一隻騰訊認購輪，晏晝蝕咗20萬元之後，換入另一隻騰訊輪。今年到依家我仲有一倍盈利，只係用閒錢炒，風險可控。」葉先生稱：「暫時帳面蝕咗20萬至30萬元，但手上啲貨未諗住放，因為相信個市都接近低位，應該會有一波升浪，加上相信『阿爺』會再出招托市，計劃今日再撈底。」
不過，Kelvin表示：「我一早都話大陸個市靠唔住喇，都無基本因素支持，所以我六月尾見唔對路已經放晒啲貨，依家阿爺放水都救唔到個市，加上外圍因素不明朗，個市絕對未見底，最少睇埋呢個月。」盧先生亦說：「依家個市變數大，加上好多A股上市公司停牌，所以我都走咁啲貨，暫時觀望下先。」
「持優質股 毋須盲目沽貨」
究竟股民應否沽貨？君陽證券行政總裁鄧聲興說：「大家最緊要冷靜，就算要沽貨、斬倉都唔好揀依家，因為通常喺人踩人、非理性拋售的時候沽貨係無意義。股市跌到某水平，反彈同埋趁低吸納就會出現，只要持有優質股，就毋須盲目沽貨。」