觀塘：平台僭建 憂變危樓
「咁大個單位係平台度『無中生有』咁起出嚟，幢樓樓齡已經有番咁上下，日日風吹雨打，都唔知有冇危險！」觀塘居民陳先生不時行經協和街，發現有樓宇平台出現僭建物，擔心危害樓宇結構，日後或會釀成意外，「起嗰陣又冇入圖則，唔知幢樓受唔受到力，依家又唔知有冇維修，陣間出咩事都唔好啦！」
屋署指已釘契
屋宇署發言人證實，涉事僭建物早已記錄在案，已按當時執法政策及《建築物條例》規定，向有關業主發出警告通知，並送交土地註冊處以註冊在業權紀錄上（俗稱釘契），直至清拆落實後方會註銷。
發言人補充，涉事樓宇為大規模清拆僭建物行動的目標之一，顧問公司職員正進行視察，當局將根據調查報告，按法例向所有須予以取締僭建物的業主發出清拆令，當中包括涉事僭建物。