政情：有相為證：田二少打高球 打出「網球手」

立法會議員田北辰（田二少）出名鍾意打高爾夫球，點知打出「網球手」！佢尋日喺立法會不經意露出包紮住嘅右手，細問之下，原來係患上「網球手」，仲喺本周一早上做完小手術。呢個小手術聽落都唔簡單，首先要喺左手抽血，然後將血液濃縮、分離，再打番入右手，過程要一小時，據講療程可以幫助撕裂嘅肌肉復原。其實呢個手術喺大約十年前已經有，但佢就唔多敢試新嘢，要等人試過先敢做。田二少仲話，手術過程痛到佢暈咁滯，仲要一個月之後先可以打波，唔知佢喺呢段期間會唔會手痕呢？