政情:區選前瞻:靚女牙醫出戰 誓剝峯鴿棚牙

中西區區議員許智峯一直係「替補」白鴿黨友立會議員單仲偕嘅大熱之一,但明年有望更上一層樓前,睇怕要先避過畀女牙醫「剝牙」,因許智峯嘅中環選區近日有位靚女牙醫劉尉欣(Vienna)頻頻亮相,宣傳旗幡橫額周街掛,據知Vienna獲區內建制派力捧,誓要踢走許智峯呢隻乳鴿。

許智峯當選後,大鬧區會嘅事件簿成呎厚,最出名莫過於去年玩轉區議會小組會議,搞到報警而鬧出「名堂」,但佔領行動後激進派吸票力強,佢嘅激進形象分分鐘幫佢打穩區選陣腳,建制派亦不敢怠慢,搵牙醫Vienna打對台。

笑言搞極速約會有市場

Vienna出任中區街坊福利會牙醫顧問多年,冇政黨背景,仲係愛狗之人。佢身兼南丫島動物保護組織幹事,同區內嘅單身、專業、高收入街坊特別啱嘴形,蛇齋餅糉都可以收埋一邊。Vienna笑言,選區內單身貴族多,佢亦認識唔少單身醫生朋友,若果搞Speed dating(極速約會)相信好有市場。唔知Vienna仲可唔可以極速掃走隻乳鴿呢?

第一手消息請下載on.cc東網iPhone/iPad/Android/Windows Phone Apps