模影模蹤:研依 千變萬化Model夢

每個人總會有一個夢想,只係隨住時間推移,能夠夢想成真嘅卻係寥寥可數。如果要問邊個真係可以堅持到底,近年喺內地極具人氣嘅火辣模特兒研依,必係其中一個。呢位擁有美艷樣貌及魔鬼身材嘅索女,憑住不斷嘗試嘅勇氣,終於將夢想化為現實。

迷人三圍

今年24歲,原名史純瑤,暱稱瑤瑤嘅研依,英文名叫Doris。喺浙江舟山出生嘅佢,據講自細已希望成為一位人氣模特兒,並希望做出一番成績。故此,喺佢18歲時便進軍模特兒界。出色嘅外形及35、24、35嘅火辣身材,固然係佢迷人嘅地方,只係除此之外,佢大膽又堅持嘅性格,更令佢散發出與別不同嘅氣質,有睇過佢寫真嘅網民甚至稱,從佢嘅眼神中可以感受到堅毅嘅魅力。憑住如此出眾嘅外形,唔單止透過極為火辣嘅寫真滲透出嚟,更令佢為成為知名時尚雜誌嘅封面女郎。此外,佢又先後為多個種類嘅品牌拍攝廣告,當中包括手機、電視、內衣、護膚產品、牙膏等等,另外佢更係多個電腦及手機遊戲嘅代言人。如果從佢呢個成績單嚟睇,相信佢已經足以自豪地稱係位成功嘅模特兒。

毅力出頭

可能有人會認為以研依亮麗外形,想喺模特兒界成名一啲都唔難,只係事實並非如此,而佢成功嘅最大因素皆因毅力兩字。話說佢18歲時為圓夢,從家鄉遠赴上海闖出一番事業。一直從事模特兒工作嘅佢,為咗可以打好根基,更投考上海銀都藝員進修學校,希望有朝一日為佢銀色旅途增加本錢。經過一年,佢嘅模特兒工作雖然唔少,但大部分都係私模工作,同佢嘅目標仍有極大距離,只係佢一啲都冇氣餒,仍努力向廣告公司應聘。直到有日,佢收到一間廣告公司電話,對方問佢有冇興趣為一本著名嘅時尚雜誌影封面寫真。據佢講,當時嘅佢興奮到聲音顫抖同腳軟,然後第一時間打電話畀母親,從此正式踏入知名模特兒行列。若非當初佢憑住堅持同毅力,相信早就被時代所掩蓋。

個人微博

密實兩個字向來同研依扯唔上任何關係,事關佢只要稍為露少少,天生嘅性感魅力已經爆發出嚟。喺美艷嘅外形之下,佢嘅性格更相當親民,更經常同粉絲喺個人微博上互動。如果想成為其中一分子,就記得去佢個微博度睇睇喇!

網址:www.weibo.com/shichunyao

研依Profile

出生地:浙江舟山

身高:176cm

三圍:35、24、35

撰文:魂