政情：公民講場：Greg蘇嫌工作攰 不如分畀人做

商務及經濟發展局局長蘇錦樑（Greg蘇）外訪或出席活動就見得多，但好似財政預算案提出嘅美食車呢啲實務性工作就一度話「唔關佢事」，功績有幾多冇人知曉。立法會議員鍾國斌（Felix）尋日就讚揚創新及科技諮詢委員會主席楊偉雄主動同各政黨會面，同時引述Greg蘇接受傳媒訪問時話，除咗處理立法會工作，「日日應酬十幾個署真係好攰」，想放假都冇機會喎。Felix話既然Greg蘇咁攰，「未來疑似（創新及科技局）局長」又唔介意做多啲，「不如畀人做多啲」好過喇！Greg蘇嘅功績已經唔多覺眼，依家仲話分多啲工作畀人做，咁佢做咩呢？淨係得閒出席活動做騷？