政情：馬時亨：笑啟剛開枝散葉
商務及經濟發展局前局長馬時亨（肥亨）同香港青年聯會（青聯）主席霍啟剛尋日獲香港貿易發展局邀請，同市民分享創業心得。不過，肥亨一開始就大嘆主辦單位今次請錯人，事關佢都無創過業，只係間接投資過連鎖壽司店，同間接幫女兒創立咗間德育學校，佢仲笑笑口話同場嘅啟剛一樣無創業經歷，只會「開枝散葉」，認真幽默。
力銷大女德育學校
身為財金界猛人，肥亨話創業最重要係了解市場需要，做好市場調查，如果唔係有幾多錢都好容易一鋪清袋。佢又力銷大女創辦嘅德育學校，盛讚大女知道市場需要，又有抱負，不單止為做生意，更要培養未來領袖。肥亨咁讚法，搞到啟剛都好有興趣，仲話要幫囝囝報名添！
至於創業心得，身兼港協暨奧委會副秘書長嘅啟剛就話，睇好國內體育市場，相信好快可以媲美美國體育市場模式，叫大家把握機會喎。