政情：李大壯：指台青懂「小確幸」
近年愈來愈多年輕人不滿香港就業難、買樓難，開始視台灣為樂土，唔少人仲想移民台灣添。不過，熟悉兩地嘅港台商貿合作委員會（商合會）主席李大壯（David）就唔係咁諗，佢話年輕人好多都覺得「隔籬個西瓜靚啲」，但實情台灣生活亦唔見得好富裕，但佢哋懂得感恩，抱有所謂「小確幸」、即係微小但確切幸福感嘅心態，唔知港青又有冇呢？
赴當地創業有難度
已出任商合會主席五年嘅David尋日推出五年工作報告，指去年台灣訪港旅客逾二百萬人次，訪台港人亦衝破一百萬人次創新高。David掌管嘅商合會並無「六六規定」，即係佢做滿六年仍可繼續做，佢未來會研究開拓直航飛往台北松山機場。
David仲話，其實台北市樓價佔收入比例全球最高，當糯米餅由以前十元台幣四塊，到依家十元台幣一塊都買唔到，台灣年輕人起薪點廿五年來仍維持三萬元台幣，唔係港青理想中咁美好。假如港青唔熟台灣「地氣」，要創業更係難上加難。