政情：泛民未上深圳先內訌
五十六名立法會議員將於周日上深圳見京官討論政改，當中包括十五名泛民主派議員，但泛民未起行已爆內訌！表明唔上深圳嘅新民主同盟范國威（Gary）及公民黨毛孟靜（阿毛），唔知係咪驚唔跟大隊會大減曝光率，尋日無喇喇開記者會，再重申一次點解唔上深圳，言語間仲寸爆泛民上深圳係「被召見」，又話深圳之行會令泛民陷入兩難同墮入陷阱，可能被撬票同分化喎。既然唔去，仲講咁多做咩吖！
阿毛話，同意立法會議員應該把握最後機會傾政改，亦同意作為立法會議員有責任同京官溝通，但就話政改係香港人、香港事，歡迎京官來港同佢哋傾，講法認真矛盾。佢又話，今次屬於「被召見」性質，去到要遵守當地法律，例如唔可以着印有六四字樣嘅衫，係非常唔適當；而政府高官隨行更係模糊化咗行政、立法關係，亦矮化咗立法會，所以唔能夠接受，真係藉口多多。
范：或被分化 毛：人各有志
Gary就話冇懸念，今次會面一定冇實質結果，反而會令泛民陷入兩難同墮入陷阱，令人覺得佢哋有可能被撬票同分化，所以佢就堅守崗位，一定會否決政改方案喎，佢咁講擺明話啲泛民可能被分化。問到會唔會被公眾覺得泛民已經四分五裂，阿毛都承認要「三日一聯署」，大家嘅理念唔一定相同，而且人各有志，但相信「殊途同歸」堅決否決政改方案喎，講到泛民上深圳就好似一定轉軚咁，莫非要好似佢咁原地踏步最好？
雖然阿毛同Gary一齊向泛民大潑冷水，但其他泛民一於好少理，喺「飯盒會」上繼續商議上深圳一事。阿毛嘅黨友梁家傑（袋巾傑）話，會上花近半小時討論有關安排，喺第一節會面中，佢哋經抽籤決定咗發言代表，分別係教育界葉建源、民主黨黃碧雲、工黨何秀蘭及佢本人。至於大家都好關注嘅道具，佢就話暫時只有代表泛民四塊版圖嘅四封信。會面後，三名京官、特首梁振英同政務司司長林鄭月娥會召開記者會，泛民就會同步喺會場外接受訪問，實行各自表述立場。