中環出更：假日行商場祥傾電話一額汗

尋日下午約三時許，黃志祥一貫西裝骨骨，手持長遮於金鐘一個商場出現，佢於商場三樓開始就一直拎住電話講個不停，起初見佢用左手拎住電話，之後講講吓又用手掩住個口，企定定挨埋商場啲欄杆度講咗一陣，表情一臉嚴肅，似乎係傾緊啲好重要嘅事情。

不斷有來電 購物未盡興

過咗一段時間，黃志祥繼續邊行商場邊傾電話，期間由三樓落到二樓後，終於收線，仲行咗入一間時裝店，佢一入內就同舖頭職員打招呼，仲暫時收起嚴肅表情，露出燦爛笑容，不過佢哋寒暄咗冇幾句，黃志祥嘅電話又再響起，因此未來得及購物，便急急腳離開時裝店。

黃志祥一度挨埋商場啲欄杆，用手掩住個口密密傾。

黃志祥入時裝店同店員傾唔夠兩句，電話又再響起。

黃志祥其後行入一間書店，於雜誌欄附近左睇右睇，挑選最新出版嘅雜誌，又喺擺放歷史書嘅書架前打咗一陣書釘，不過期間依然不斷有電話打入，見佢睇吓書又傾兩句電話，周身唔得閒。睇咗大約十幾分鐘後，黃志祥搵到啱心水嘅書就畀錢，右手拎住袋書，左手繼續拎住電話步出書店。

卓妮