政情：「絕食女」任學民新發言人
去年在佔領行動走在最前線嘅學民思潮，領導層出現變動，原發言人黎汶洛前晚「搶閘」自行宣布不再出任發言人後，喺佔領期間絕食嘅中六女成員黃子悅又喺學民嘅社交網站專頁上宣布自己會擔任新發言人，直到尋日又到黃之鋒宣布自己喺無人競爭下連任召集人。在多名舊人先後退會或退任要職後，「雙黃」黃之鋒及黃子悅將成為學民僅餘較為人熟悉嘅領導層。
黃子悅於一三年先加入學民思潮，喺佔領期間響應黃之鋒進行絕食，持續咗一百一十八小時、即絕食五日才因身體不支而結束，為最遲停止絕食嘅首輪學民成員。佢事後曾透露，其父母一直反對佢參與佔領行動及進行絕食。佢話決定參選發言人一職，係因為呢幾年間目睹過政權嘅殘酷，感受到人們嘅憤怒，令佢由一個只顧讀書嘅中學生，變成一個社會運動參與者。