中環出更：密密巡新界 陳勇超選味濃
新界社團聯會（新社聯）日前舉行三十周年聯歡酒會，但唔知係咪年底區議會選舉臨近，好多嘉賓嘅話題都離唔開選舉。好似主人家新社聯理事長陳勇咁，有傳佢明年可能會參選立法會「超級區議會」議席，但佢就兜個彎話，最近差唔多每兩日就走勻新界九個區，仲整壞咗兩架車添，好彩係二手車啫。唔係選超級議席又使乜走勻新界吖！
現為北區委任區議員嘅陳勇，早前對係咪出戰超級議席仍不置可否，但佢日前喺酒會上告知卓妮，佢喺葵青區長大，又曾經喺荃灣區助選，加上依家隔兩日就走勻新界九區，對新界情況都有番咁上下認識嘅。佢又話，自己擔當「執波仔」同後衞角色，專門負責為前面嘅人補位，補咩位都冇乜所謂喎。
新社聯屯重兵戰區選
新社聯副總幹事李世榮就話，佢哋將會派重兵參選年底區選，但就唔肯透露詳情，遲吓先再公布。咁係咪會同鄉事派對撼呢？佢話鄉議局副主席張學明本身係新社聯榮譽會長，相信唔會有問題喎。
另外，新界鄉議局下月舉行正、副主席選舉，主席劉皇發好大機會連任再做多一屆，荃灣鄉事委員會主席鍾偉平就笑言「有發叔，平天下」，又話自己做咗四屆荃灣鄉事委員會主席，嚟緊又會做多一屆，即係做咗成二十年喇，要畀多啲機會後生仔上位喎。莫非佢升呢做鄉議局副主席嘅傳聞係假嘅？
卓妮同場又見到聯合國兒童基金香港委員會主席陳晴（Judy），見佢同如意寶白瑪奧色法王好好傾，原來佢同法王都係世貿聯合基金總會成員，法王係創會主席，而Judy則係該會嘅行政議會主席，自然成為好友。法王話，目前佢冇固定居所，四海為家，有時都會來香港住吓嘅。
卓妮