泥車甩孖轆飛轟的士
泥頭車飛甩孖轆，一毀的士一失蹤幸無人傷！一輛三十噸重泥頭車，昨晨滿載濕泥，由港島往將軍澳堆填區，沿觀塘繞道東行至觀塘碼頭對開，司機察覺車輛有異，將車靠左駛落橋檢查。接近燈位前，泥頭車左尾孖轆的一個轆甩脫，滾動向前擊中停在燈位的士的車尾，車尾凹陷，「的士姐」驚聞巨響以為天降飛轆嚇餐死，幸事故中無人傷。警方調查發現孖轆另一個轆疑在橋面時已甩脫，事後無法尋回，泥頭車被拖走檢驗，這是近兩個月內第三宗甩轆事故。
昨晨十一時許，姓唐（五十歲）司機駕駛滿載濕泥的泥頭車，由港島深水灣往將軍澳堆填區。泥頭車沿觀塘繞道東行，至觀塘碼頭對開，唐察覺行車不穩，遂靠左駛落橋擬停車檢查。詎料在交通燈位前不遠，左尾孖轆的一個直徑約三十吋、重約七十磅的轆甩脫，沿斜路翻滾，適時一輛載客的士停在燈位擬左轉入偉業街，車尾遭甩轆「嘭」一聲撞凹，甩轆再反彈滾到路邊。
另一轆無蹤 疑早甩脫
姓李（五十七歲）女的士司機乍聞巨響落車查看，赫見路旁有個轆，以為甩轆從天橋飛下，惟當見到泥頭車左尾孖轆不翼而飛，始知是其甩轆出事，遂致電報警。警員到場調查，只見其中一個車轆，孖轆另一個轆不知所終，懷疑泥頭車在橋面行駛時已甩脫。
事後，唐急召另一輛泥頭車到場將濕泥運走，警方拖走肇事泥頭車檢驗。「的士姐」憶述稱，「突然『嘭』一聲飛個轆埋嚟，好驚！」又指「以為畀人撞，落車睇見有個轆，仲以為喺上面（橋）飛落嚟，嚇餐死！」她表示駕駛的士搵食多年，從未遇上這種意外，「估唔到一遇到就上報紙，今日一定要買報紙睇。」泥頭車司機承諾賠償維修費，她亦無奈接受。
前月意外 女廚師枉死
香港汽車工業學會主席李耀培估計，可能螺絲帽鬆脫釀成意外。他指出，由於泥頭車一般會用價錢較平的翻倒胎，頻繁拆換輪胎，技工用風炮上實螺絲時，可能將壓力加大或減少，導致螺絲帽壽命縮短，結果斷裂或鬆脫致甩轆；故換胎時，須將風炮的壓力調校至適當磅數，避免意外。
本港過去近兩個月亦先後發生過兩宗甩轆意外，最嚴重一宗在三月三十日，一輛「紅頂」小巴在牛頭角觀塘道高速行駛時前轆甩脫，甩轆飛彈一百米，擊斃在巴士站候車的德國寶女廚師。另五月七日，有小巴在牛頭角道甩脫一對尾轆，擊中「白車」幸無人傷。