政情：建制誓續掌葵青區會
港府宣布於二○一六年取消區議會委任制，目前部分建制派同泛民勢力相若嘅區會或會變天，其中過去特別以泛民主導嘅葵青等多個區議會最有機會「翻盤」，進而一舉重奪有關區議會主席或副主席位置。不過，泛民嘅如意算盤未必敲得響，事關委任議員方平為連任葵青區會主席，已經鋪路轉戰民選議席；另有傳即使方平未能連任主席，建制派寧可接受葵青區會前主席、民主黨前成員周奕希接任，都唔會畀泛民代表奪得主席一職。
方轉戰民選 擬落戶安灝
全港十八區區議會形勢於取消區會委任議席後，將會產生微妙變化，事關建制派依家喺部分區會，要連同委任議員才取得該區主導權，舉例指撇除委任議席，葵青區嘅泛民略多於建制派，即十五席對十四席，據聞有關方面都擔心泛民好大機會重奪該區主導權。
綜合各方消息指，有傳建制派已做好兩手準備，一方面現任葵青區會主席方平，已有轉戰民選議席嘅落腳點，就係接替其政團成員譚惠珍，積極考慮於其安灝選區參選，成功當選就密謀連任區會主席。
傳梁廣昌復出 葵盛惡鬥
但有地區人士分析，方平過去主持會議曾有甩漏，而方平亦未有如部分區會主席出錢又出力，再度出任主席或有阻力；另一可能主席人選係曾做過兩屆區會主席嘅周奕希，據知佢一向被視為泛民一員，不過早前退出民主黨，據報又獲委任為肇慶市政協，加上個別獨立泛民亦同周有傾有講，因此建制派於關鍵時刻為封殺泛民代表出任主席，或考慮轉為畀周重掌主席一職。
除咗葵青區會主席一職乃兵家必爭之地，個別選區亦有連場火併。有地區人士爆料，指早年被判詐騙罪成遭褫奪議席、被視為泛民一員嘅葵青區前議員梁廣昌，有傳有意重出江湖，挑戰現任葵盛東邨選區議員嘅街工周偉雄，睇怕到時又係一場惡鬥。