中環出更：周浩鼎不介意象哥再連任
最近剛升呢做民建聯副主席嘅離島委任區議員周浩鼎（Holden），本身係中華出入口商會（中出）常務會董，政圈一直流傳現任立法會進出口界議員黃定光（象哥）有意畀Holden接棒，但中出會內就有唔同聲音，認為唔使咁快下定論。Holden都話現時講立法會人選實在言之過早，但佢有一點好肯定，就係如果象哥想選多屆，中出應該冇乜人有異議。
「暫時唔諗接棒」
近年喺論壇打出名堂嘅Holden，都算係政壇新星，最近仲做埋黨副主席，可以話更上一層樓。對於係咪有機會接象哥棒，Holden就話目前唔想諗呢啲住，暫時會專注會務，希望大家唔好只留意中出邊個做接班人，因為呢啲嘢有好多變數喎。
咁講又確實有道理，始終象哥都唔係第一次話交棒畀第二梯隊，上屆立法會選舉佢已經咁講，但結果係佢老人家又坐多一屆。所以Holden都有講，如果象哥仲想連任，佢絕對支持。明年係點冇人知，但今年年底就係區議會選舉，睇嚟Holden疊埋心水準備好應戰區選，可能仲划算。
卓妮